కలియుగ వైకుంఠంగా, సమస్త మానవాళిని కాపాడే పుణ్యక్షేత్రంగా తిరుమల విరాజిల్లుతోంది. ఇక్కడ కొలువైన కలియుగ దైవం శ్రీ వేంకటేశ్వర స్వామిని భక్తులు ఎంతో భక్తితో శ్రీనివాసుడు అని కొలుచుకుంటారు. “శ్రీనివాస గోవిందా.. వేంకటరమణ గోవిందా” అంటూ తిరుమల కొండలపై భక్తులు చేసే నామస్మరణ మారుమోగుతూనే ఉంటుంది. అయితే, స్వామివారికి అసలు శ్రీనివాసుడు అనే నామధేయం ఎలా వచ్చింది? దీని వెనుక ఉన్న పురాణ గాథ ఏమిటో ఇప్పుడు తెలుసుకుందాం.
పురాణాల ప్రకారం.. కలియుగం ప్రారంభానికి ముందు లోక కల్యాణం కోసం ఒక మహా యజ్ఞాన్ని నిర్వహించాలని మహర్షులు సంకల్పించారు. ఆ యాగానికి త్రిమూర్తులలో ఎవరు అధిపతిగా ఉండాలో నిర్ణయించే బాధ్యతను భృగు మహర్షికి అప్పగించారు. భృగు మహర్షి సత్యలోకానికి వెళ్లగా బ్రహ్మదేవుడు పట్టించుకోలేదు, కైలాసంలో శివుడు తన తాండవంలో మునిగిపోయి నిర్లక్ష్యం చేశాడు. దీంతో ఆగ్రహించిన భృగువు వారిద్దరినీ శపించి, చివరగా వైకుంఠానికి చేరుకున్నాడు.
అక్కడ శ్రీమహావిష్ణువు లక్ష్మీదేవితో కలిసి శేషతల్పంపై శయనించి ఉండటం చూసి, కోపోద్రిక్తుడైన భృగు మహర్షి.. లక్ష్మీదేవి నివాసస్థానమైన విష్ణుమూర్తి వక్షస్థలాన్ని తన కాలితో తన్నాడు. స్వామి వారు కోపగించుకోకుండా, మహర్షి అహంకారాన్ని అణచడానికి ఆయన పాదాన్ని ఒత్తుతూ, ఆ పాదంలో ఉన్న మూడవ కన్నును (అజ్ఞానాన్ని) తొలగించారు. అయితే, తన నివాస స్థానాన్ని భృగువు తన్నడం, దానికి స్వామివారు క్షమాపణలు చెప్పడం చూసి ఆగ్రహించిన లక్ష్మీదేవి వైకుంఠాన్ని విడిచి భూలోకానికి వెళ్ళిపోయింది.
లక్ష్మీదేవి విరహంతో అలమటిస్తూ శ్రీమహావిష్ణువు కూడా భూలోకానికి చేరుకున్నాడు. శేషాద్రి పర్వతాలపై (తిరుమల కొండలు) అడుగుపెట్టి, అక్కడ వకుళాదేవి (ద్వాపర యుగంలో యశోదమ్మ పునర్జన్మ) ఆశ్రమానికి చేరుకున్నాడు. చిన్న కృష్ణుడి రూపంలో కనిపించిన స్వామివారిని చూసి వకుళ మాత ఎంతో మురిసిపోయింది. ఎవరు నాయనా నువ్వు? నీ తల్లిదండ్రులు ఎవరు? అని అడగగా.. స్వామివారు నాకంటూ ఎవరూ లేరు అమ్మ, కానీ నేనే అందరివాడిని. పాలకడలిలో ఉన్నప్పుడు నా వక్షస్థలంలో శ్రీ (లక్ష్మీదేవి) ఉండేది, కానీ ఇప్పుడు ఆ సిరి నన్ను వీడి వెళ్ళిపోయింది అని తన బాధను చెప్పుకున్నాడు.
స్వామివారి మాటలకు చలించిపోయిన వకుళాదేవి.. నీ అంతటివాడే అలా బాధపడకూడదు నాయనా.. ఈ కలియుగంలో ఆ శ్రీ (లక్ష్మీదేవి) ఎల్లప్పుడూ నీ యందే స్థిర నివాసం ఏర్పాటు చేసుకుంటుంది. నువ్వు లోక పూజితుడవైన శ్రీనివాసుడు (శ్రీ కి నివాసమైనవాడు) గా విరాజిల్లుతావు అని ఆశీర్వదించింది. అలా వకుళ మాత ఇచ్చిన ఆశీస్సులతోనే స్వామివారికి శ్రీనివాసుడు అనే నామం స్థిరపడింది.
ఆ తర్వాత వకుళ మాతే స్వయంగా ఆకాశరాజు కుమార్తె అయిన పద్మావతి అమ్మవారితో శ్రీనివాసుడికి వివాహం జరిపించింది. ఈ కళ్యాణం కోసం కుబేరుడి వద్ద స్వామివారు అప్పు తీసుకున్నట్లు పురాణాలు చెబుతున్నాయి. పెళ్లయిన తర్వాత శ్రీనివాసుడు, పద్మావతి అమ్మవారితో కలిసి శేషాద్రి కొండలపై కొలువుదీరారు.
కొంతకాలానికి కొల్హాపూర్ నుంచి లక్ష్మీదేవి కూడా తిరుమలకు చేరుకుంది. శ్రీలక్ష్మి, పద్మావతి అమ్మవార్ల మధ్య చిన్నపాటి వాదోపవాదాలు జరుగుతున్న సమయంలో.. స్వామివారు భక్తుల క్లేశాలను హరించడానికి, కలియుగాంతం వరకు లోకాన్ని రక్షించడానికి తిరుమలలోని ఆనంద నిలయంలో సాలగ్రామ రూపంలో, అర్చావతార మూర్తిగా శిలారూపం దాల్చారు. లక్ష్మీదేవి స్వామివారి వక్షస్థలంలో, పద్మావతి అమ్మవారు మరో భాగంలో నిలిచిపోయారు.
లక్ష్మీదేవికి శాశ్వత నివాసమైన వక్షస్థలాన్ని కలిగి ఉండటం వల్లే స్వామివారు శ్రీనివాసుడు అయ్యారు. నేటికీ తిరుమలకు వచ్చే భక్తులు ఆ శ్రీనివాసుడిని దర్శించుకుని, తమ కష్టాలను తీర్చమని వేడుకుంటూ తరిస్తున్నారు.
