‘క్రెడిట్ అవుట్రీచ్’ నివేదిక అందజేత
PM Narendra Modi: నరసరావుపేట పార్లమెంట్ సభ్యులు లావు శ్రీకృష్ణదేవరాయలు ( Lavu Sri Krishna Devarrayalu ) సోమవారం న్యూఢిల్లీలోని అధికారిక నివాసంలో భారత ప్రధానమంత్రి నరేంద్ర మోదీ ( Prime Minister Narendra Modi ) తో మర్యాదపూర్వకంగా సమావేశమయ్యారు. పల్నాడు జిల్లా కేంద్రమైన నరసరావుపేటలో జూలై 17న నిర్వహించిన ‘క్రెడిట్ అవుట్రీచ్ ప్రోగ్రామ్’ విజయంపై రూపొందించిన ‘పల్నాడు: ఎ క్రానికల్ ఆఫ్ ఫైనాన్షియల్ ట్రాన్స్ఫర్మేషన్’ (Palnadu: A Chronicle of Financial Transformation) అనే ప్రత్యేక నివేదికను ప్రధానికి అందజేశారు.
రూ. 3,216 కోట్ల రుణాలు – 1.03 లక్షల మందికి లబ్ధి
ఈ భేటీలో పల్నాడు జిల్లాలో సాధించిన ఆర్థిక ప్రగతి వివరాలను ఎంపీ లావు ప్రధానికి సమగ్రంగా వివరించారు. ఈ కార్యక్రమం ద్వారా మొత్తం 1,03,246 మంది లబ్ధిదారులకు రూ. 3,216 కోట్ల రుణాలను పంపిణీ చేసినట్లు తెలిపారు. విశేషమేమిటంటే, వీరిలో దాదాపు 70,000 మందికి పైగా లబ్ధిదారులకు బ్యాంకుల ద్వారా రుణం అందడం ఇదే తొలిసారి.
Narasaraopet MP Lavu Sri Krishna Devarayalu Meets PM Narendra Modi, Submits Report on Palnadu Financial Growth
ముఖ్యమైన గణాంకాలు:
వ్యవసాయ రంగం: 83,365 మంది రైతులకు రూ. 2,286 కోట్ల వ్యవసాయ రుణాలు.
ఇతర రంగాలు: వేలాది మంది మహిళలు, యువత, MSMEలు, చేతివృత్తుల వారు మరియు స్వయం సహాయక సంఘాలకు (SHGs) విస్తృత స్థాయిలో ఆర్థిక సాయం.
వికసిత్ భారత్ దిశగా ప్రోత్సాహం – ప్రధాని అభినందనలు
భవిష్యత్తులో వ్యవసాయం, ఎంఎస్ఎంఈలు, మౌలిక సదుపాయాల కల్పన మరియు ఉద్యోగ అవకాశాల సృష్టి ద్వారా పల్నాడు జిల్లాను మరింత అభివృద్ధి పథంలో ముందుకు తీసుకెళ్తామని ఎంపీ ఈ సందర్భంగా ప్రధానికి స్పష్టం చేశారు.
గ్రామీణ స్థాయిలో స్వయం ఉపాధిని ప్రోత్సహిస్తూ ఆర్థిక వృద్ధికి తోడ్పడేలా పల్నాడు జిల్లాలో చేపట్టిన ఈ బృహత్తర కార్యక్రమాన్ని ప్రధానమంత్రి నరేంద్ర మోదీ ప్రత్యేకంగా అభినందించారు. గ్రామీణ సాధికారతతో పాటు, ‘వికసిత్ భారత్’ లక్ష్య సాధన దిశగా అడుగులు వేసేందుకు కేంద్ర ప్రభుత్వం నుంచి సంపూర్ణ సహకారం ఉంటుందని మోదీ హామీ ఇచ్చారు.
